HaMaDa
مشرف المنتدى الترفيهى
عدد الرسائل : 281
العمر : 33
العمــــــل : 
الهوايـــــه : 
توقيع المنتدى : 
تاريخ التسجيل : 31/07/2008
 |  موضوع: جمعية الحرنكش (الحلقة الثانية)  الأربعاء أغسطس 20, 2008 11:15 pm | |
| جمعية الحرنكش الفصل الأول
تابع المشهد الأول
عمر : املوا بطونكم كويس .. الأسبوع الجاى مفيش حرنكش . ماهر ( فى فزع ) : ليه بقى ؟! فتحى : عشان خلاص .. بح .. الميزانية خرمت . ماهر : مش حتكفى حتى الحرنكش ؟! صلاح : و انت فاكره رخيص .. ماعدش فيه حاجة رخيصة فى الزمن ده . عمر : لأ .. فيه . سعد : ايه بقى ؟! عمر : احنا . ماهر : و الله عنك حق .. أدينا أهو .. خمس شباب زى الورد , اتخرجنا بشهادات عليا , و مش لاقين وظيفة تلمنا . فتحى : ماهو من خيبتنا . صلاح : لأ و انت الصادق .. من غلبنا .. لا أبونا وزير , و لا حتى غفير .. كلنا أهلنا على قد حالهم , و لحافهم مبيكفيش حتى يغطى رجليهم .. سعد : طب و انت مالك و مالنا بقى .. انت مش اشتغلت النهارده ؟! ماهر : الله ؟؟ انت اشتغلت يا صايع ؟!.. وماتقوليناش صلاح : كلهم عارفين , ماعدا انت . ماهر : و اشمعنى أنا . عمر : عشان قال لنا فى السكة , و احنا جايين عليك يا فالح . ماهر : المهم واحد مننا اشتغل أخيرا .. و الله بشرة خير ي ولاد .. الهى يا رب نشتغل كلنا , و نفض جمعية البطالة دى بقى ! صلاح : يعنى .. ماهر : شكلك كده مش مبسوط م الشغلانة الجديدة . صلاح : أصلها مش مناسبة لدراستى . عمر : و دراسة التاريخ دى حتشغلك ايه بقى , ان شاء الله ؟! سعد : أنا أخويا خريج علوم قسم جولوجيا , و اشتغل موظف حسابات . ماهر : و انت اشتغلت ايه يا صلاح ؟ صلاح : هوم دليفرى . يصمتون جميعا لحظات مصدومين . سعد : أهى حاجة تاريخية برضه . فتحى : المهم تطلع منها بقرشين كل شهر و السلام .. أنا مستعد أشتغل فى الفاعل , بس أبطل أخد مصروف من أبويا .. ده كل يوم يسمعنى كلمتين . عمر : أمال أنا أعمل ايه ؟!.. أبو خطيبتى ادانى انذار أخير .. يا اشتغل و أقدر أفتح بيت , خلال ست شهور يا حيرجعلى الدبل . صلاح : أنا مريت بالموقف ده قبلك , بس كان حظى أحسن منك شوية . عمر : ازاى ؟ صلاح : لما خطبت رحنا أنا و هى نشوف شقة .. المقاول الله يكرمه , شال عنى الهم كله . سعد : اداك شقة ؟! صلاح : لأ .. اتجوزها هو ! فتحى : أنا عشان كده شايل موضوع الجواز ده من مخى خالص .. لما أخلص الماجستير , أبقى أفكر فيه . ماهر : ماجستير ايه يا ابنى بس .. البلد دى مش بتاعة شهادات صحيح .. انت صدقت دسوقى أفندى و لا ايه ؟! صلاح : ثم ان فيه واحد حكيم قال : وراء كل عظيم امراة . عمر : و فيه واحد قال وراء كل امراة عظيمة رجل . سعد : ده واحد حكيم برضه ؟ عمر : لأ .. واحد كمسرى . فتحى : أدينى بأضيع فيه وقت , لحد ما الاقى شغل . نسمع فجأة ضحكة ( سنية ) جارتهم , عابثة مرتفعة .. ماهر : دى سنية , مرات جارنا متولى المخبر . عمر : هو جوزها نبطشى النهارده كمان ؟! ماهر : لأ .. هنا . سعد : يا بخته . صلاح : و انت مش ناوى تخطب بقى يا ماهر ؟ ماهر : منين يا حسرة ؟ عمر : على الأقل عندك شقة . ماهر : دى شقة أوضة و صالة , كنت عايش فيها مع أبويا و أمى - الله يرحمهم - بالتيلة . فتحى : أنا لو منك , كنت بعت التيلة كمان . سعد : طب متتجوز فيها , لحد متلاقى شقة أوسع . ماهر : و مين حترضى ؟!.. و لو لقيت اللى ترضى تسكن قى حق , حأجيب مصاريف الجواز منين ؟! عمر : بالذمة دى دولة دى , اللى الشباب فيها يبقى طاقة معطلة و مكبوتة كده ؟! صلاح : ما هو كل ما نتكلم , يقولولنا زيادة السكان .. نتكتم . سعد : ما لها زيادة السكان ؟!.. ما الصين قدنا عشر مرات , و رغم كده بتستفيد من كل مخلوق . ماهر : العيب فى النظام يا باشا . فتحى : تعرفوا أنا لو مسكت البلد دى كنت أخليها قوة عظمى . سعد ( ضاحكا ) : تصور بقى , لو تبقى الدولةجمعية حرنكش ؟! عمر : و ليه لأ ؟!.. و كل واحد مننا يمسك وزارة , بدل م احنا قاعدين عاطلين كده ! صلاح : وزارة مرة واحدة ؟! عمر : و فيها ايه ؟! ماهو كل واحد بيبقى وزير .. افترض يا أخى ان جمعيتنا بقت الحزب الحاكم , و الوزرا لازم يطلعوا منها . ماهر : ساعتها أمسك انا وزير التموين , و أغرق البلد حرنكش ! فتحى : و أنا أمسك وزير داخلية ! سعد : اشمعنى ؟! فتحى : عشان هو اللى طايح فى البلد .. لا حد بيسأله بيعمل ايه , و لا ليه . عمر : و انت بقى عايز تطيح ؟! فتحى : اسكت يا مواطن ,لأعتقلك ! ماهر : من أولها كده ؟! عمر : و ليه أنا أبقى مواطن .. أنا راخر حأبقى وزير ! سعد : وزير ايه بقى ان شاء الله ؟! سعد : وزير المسخرة ! يضحكون . ماهر : هو فيه وزارة للمسخرة ؟ عمر : أكيد .. افتح التلفزيون و انت تعرف . صلاح : وله انت و هو .. هات ورقة و قلم . ماهر : اشمعنى ؟ صلاح : حنقسم الوزارة ! يحضر ماهر ورقة و قلما , و يقول فى حماس : - يبقى انت بقى تمسك وزير التخطيط , و عمنا سعد , يبقى وزير أوقاف . فتحى : يعنى مالقيتش غير الأوقاف ؟! ماهر : أعمل له ايه ؟!.. ما هو الوحيد اللى مربى دقنه فينا . يمسك صلاح الورقة و القلم , و يبدأ ماهر فى صب المشروب من الشفشق فى الأكواب , و صلاح يكتب , قائلا : - الاجتماع الأول لجمعية الحرنكش .. و هنا تنطلق ضحكة رقيعة أخرى , حاملة صوت سنية , فيقول ماهر لعمر فى حزم : - شوف شغلك يا وزير .
سيتم استكمال الموضوع بعد ردودكم لكى أعرف رأيكم
| |
|
